அறப்பணியற்றும் தகைசால் சான்றோர்க்கு தலைவணங்கும் வாழ்த்து ✍️ கவிஞர் விஜயநேத்ரன்
வாழ்க்கை
மிகப்பெரிய
ஆசிரியர்....
நாம் எதையும்
கற்றுக்கொள்ள
மறுத்தாலும்,
நமக்கது
எல்லாவற்றையும்
கற்றுக்கொடுக்க
மறப்பதில்லை....
ஆர்ப்பரிக்க
நாம் மறந்தாலும்,
ஆச்சரியப்படுத்த
மறப்பதில்லை
வாழ்க்கை...
நொடிக்கொரு
படிப்பினையுடன்
வழியெங்கும்
காத்திருக்கிறது....
வாழ்க்கைப் பாடங்களாய்...
மாற்றங்களோ ஏமாற்றங்களோ
தடுமாற்றங்களோ தடம்மாற்றங்களோ
வெற்றியோ தோல்வியோ
இன்பமோ துன்பமோ
ஏதோவோர் வடிவில்
கற்றுக்கொடுக்கிறது
வாழ்க்கை...
கற்றுக்கொள்ள
நாம் மறுத்தாலும்....
எதிர்ப்படும்
எல்லாவற்றிலும்
ஏதோ ஒன்றைத்
தருகிறது....
படிப்பினையாய்..
படிப்படியாய்...
ஆம்...
வாழ்க்கை
மிகப்பெரிய ஆசான்....
கற்றதைப் பகிர்ந்து,
கலங்கரை விளக்கமாய் உயர்ந்து,
தன்னை மெழுகாக்கி,
தன் விழியால் ஒளியேற்றி ,
அறிவொளி வழங்கி,
அறியாமை இருளகற்றி,
நூல் ஏணியாய் தாம்மாறி,
ஆல் போல் படர்ந்து,
அறிவொளிதான் வழங்கி,
வாழையடி வாழையென
வருங்காலமது தழைக்க,
நல்வாழ்விற்கு வரமளிக்கும்,
தன்னலமில்லா தகைசாலர்களுக்கு,
தலை வணங்கி வாழ்த்துகிறேன்..
வாழ்க்கையைக் கற்றுக் கொடுக்கும் அனைவருக்கும் ஆசிரியர் தின வாழ்த்துகள் ...
✍️ கவிஞர் விஜயநேத்ரன்
